lainformacion.com - Medio Oficial de los Premios Bitacoras 2009
Poesie del 1960 di Franco Penza
‘A festa d’’o paese----------------------
È dummeneca.
È festa ‘o paese,
‘a ggente è ccurtese
c’’o vestito‘e sposa
‘e ‘o core nnammurato.
S’allucca, se strilla,
belle zitelle e brutte
‘mpiazza ce so’ ttutte.
‘A vecchia c’’a parrucca.
A ttutte parte è scerocco,
nisciuno cu ll’uocchie triste,
è scumparuta ‘a malinconia,
pure ll’ommo scellerato
tene ‘o core d’allegria,
s’arricorda d’’a puisia
parla e ccanta in armonia.
Che sso’ nnato a ffà------------------------.
Nun saccio che sso nnato a ffà
Me dumandaje tantu tempo fa.
Forze pigliato d’’o sconforto,
forze p’ato, però no’ a tuorto.
Mo’ stu pensiero assillante,
addò stongo me tormenta,
po’ me scordo e m’arricordo
o pe’ bbene o pe’ discordia.
So’ nnato stuorto ‘e cerevella?
Forze so’ gguaglione e pessimista,
ma io ‘a vita mia a mettesse all’asta.
Na vota rido sempe, quanno trovo
‘a vicchiarella mia, vicina a lampa.
Essa vede ca so triste e chiagne:
e io chiagnenno chiagnenno dico:
Allora, so’ nnato e che so nnato a ffà?
-----------------------
So’ ppassati ll’anni
e tu nun si’ ccagnata,
‘a faccia è ‘a stessa,
pur’‘o sentimento,
e dduie file argiento
bbelli a tenè mente.
‘O vicchiariello guarda
dicenno: è sempe ‘a stessa.
Penzanno ca scumpare
E io perdo ll’affetto caro
M’arrogno ‘nterezzuto
Ma po’ dico è ‘a vita.
Mamma, parola bella,
ca regna ‘a vucchella.
‘A vicchiarella è ‘n’armonia
Ca tene allero ’o core mio.